ỌDỊMARA NA URU NZU BARA N’EKPEMEKPE ỌDỊNALA IGBO

Abstract

Ụmịedemede Ndị Igbo nwere omenala na nkwenye dị ọkpụ sitere n’ aka ndị ochie mana ọgbọ nọ ugbua naeleghara omenala na nkwenye ndị ahụ anya mezie ka ọtụtụ n’ime ọmarịcha omenala ndị ahụ naanwụ. Ihe kpatara nke a bụ ọchịchị ndị mbịarachịwa na nleghara anya n’ebe ihe e ji mara ndị Igbo. Nzu bụ nnukwu ihe na ndụ ndị Igbo. N’ịnabata ọbịa, ọ bụrụ na ọjị gachaa nzu na-esote ya dị ka ihe e ji ele ọbịa nke mere ya ka ọ bụrụ ngwa keọdịmara n’ekpemekpe ọdịnala Igbo. Ekpemekpe ọ bụla n’ụwa niile nke ekpemekpe ọdịnala Igbo bụ otu n’ime ha nwere ọdịmara dị iche iche e ji mara ya. Ọdịmara nwere ike ịdị n’ụdị ihe ndị a na-ahụ anya ma ọ bụ ihe a naghị ahụ anya, okwu ọnụ ma ọ bụ agwa nwere nzipụta ihe ndị ahụ na-enyere ndị isi ekpemekpe aka ịkụziri ndị otu ha eziokwu dị n’ihe ha kwenyere. Ebe ọdịmara na-adịkarị n’ụdị ekereuche, o nwerịrị ihe ọ na-anọchi anya ya. Ebumnuche nchọcha a bụ izipụta na nzu abụghị naanị na ọ bụ ọdịmara n’ekpemekpe ọdịnala Igbo kama na o nwekwara uru ndị ọzọ ọ baara ọ bụladị ndị ekwenyeghị n’ekpemekpe ahụ. Ebumnuche ọzọ bụ igosi ihe bụ ọdịmara n’ekpemekpe ọdịnala. Ụfọdụ ndị odee emeela nchọcha banyere uru na ọdịmara nzu n’ekpemekpe ọdịnala Igbo ndị ha dere n’asụsụ Bekee. Nke a kpalitere mmụọ ome nchọcha ịkwado ihe ndị odee ndị ọzọ derela banyere nzu ma were asụsụ Igbo dee ya nke mere ka ọ pụọ iche. E ji atụtụ Ịntarakshọnism keọdịmara were zipụta na ọdịmara na-akpalite ezi mmekọrịta n’etiti mmadụ, eke na gburugburu ya. A gbasoro usoro nchọcha kenkọwa na kesọvee were mee nchọcha a.Nchọpụta gosiri na nzu bụ ọdịmara na-egosi obi ọcha, nnabata, ịdị asọ dịrị gawa. A tụrụ anya na site na nchọcha a, na ndị Igbo ga-amata na ihe ụfọdụ ha na-ahụ nke nzu bụ otu n’ime ha nwere nghọta miri emi ha nwere nke bụ ihe ha na-anọchi. Nke a ga-eme ka ha were nzu kpọrọ ihe etu o kwesịrị.