NTỤCHA ỤDAOLU NA MMỤBA ECHICHE OKWU N’IGBO

Abstract

Ụmịedemede Nchọcha a gbadoro ụkwụ n’inyocha etu dị iche iche olu e ji kpọọ okwu Igbo si amụbanye echiche dị n’okwu. Mbunuuche nwa nchọcha bụ ịkọwa ihe ụdaolu pụtara, ịchọpụta ụdị ya, ebe dị iche iche ọ na-abata na mkpụrụokwu na usorookwu nakwa etu o si eweta mgbanwe n’echiche okwu na usorookwu ndị ahụ. Nka e jiri mee nchọcha a bụ nchọcha e dere ede nke a chọpụtara site n’ọba akwụkwọ dị iche iche nakwazị ajụjụ ọnụ a gbara ndị maara nke ekwe na-akụ n’amụmamụ Igbo. Nsogbu nchọcha a bụ na e mebeghị nchọcha n’isiokwu a bụ ịtụcha ka ụdaolu si amụba echiche dị n’okwu Igbo. Atụtụ e jiri mee nchọcha a bụ atụtụ akụkụ nnọrọonwe. Ka e mechara nchọcha a, a chọpụtara na ụdaolu so n’ụmụ akpọmakpọ e nwere bụkwanụ nke na-emetụta echiche maọbụ nghọta dị n’okwu. A chọpụtakwara na ụdaolu nwere ike iweta mmụba n’echiche mkpụrụokwu nakwa usorookwu n’asụsụ Igbo. Ọzọ, e wepụ mmụba echiche dị n’okwu, ụdaolu na-enyekwa aka na mmụba ọnụọgụokwu e nwere n’asụsụ Igbo. Na mmechi, nwa nchọcha na-atụ aro ka onye ọbụla nwere mmasị n’ịmụasụsụ Igbo tụmadụ n’ebe o metụtara akpọmakpọ, nghọta nakwa usorookwu were akwụkwọ nchọcha a gụọ n’ihi na ọ ga-abụ ihe ntuzi aka n’ebe ihe ọmụmụ banyere ụdaolu na mmụba echiche okwu dị.