AHA OSISI NSỌ ỤFỌDỤ: URU HA BAARA NDỊ iGBO

Abstract

Ụmịedemede Aha bụ ihe e jiri mara mmadụ, anụmanụ, ihe ndị na-eku ume maọbụndị anaghị eku ume.Osisi nso bụ otu n’ime osisi Chinekekere nke nwere ugwu na nsọpụrụ n’ụzọ pụrụ iche n’ala Igbo. Ihe kpalitere mmụọ nwanchọcha ime nchọcha a bụ ime kandị mmadụ mata mkpa osisi dị n’ala Igbo, ugwu na nsọpụrụ osisi ụfọdụ nwere nke ọtụtụ ụmụafọ Igbo amabeghị ruo taa. Nwanchọcha ahụbeghị onye merela nchọcha iji chọpụta ha. Ihe nwanchọcha bu n’obi bụ ịchọpụtagasị aha osisi ndị ahụ ma detuo ha n’akwụkwọ. Ebumnoobi ọzọ bụ ime ka anya ụmụafọ Igbo meghee n’ịchọpụta na osisi ụfọdụ ha na-ahụ kwa mgbe nwere ọrụ pụrụ iche ha na-arụgasị n’ala Igbo. Atụtụmgbakwasa ụkwụ nchọcha a bụ atụtụ njirieme na atụtụ nrụgaara aka. Nchọcha a gosịrị na ụfọdụ osisi e nwere n’ala Igbo nwere ndị na-ezipụta adịm ọcha dị ka n’ọfọ, ụdara na-egosi obi ụmụaka, ogirisi na-egosi oke ihe maọbụ ihe mwute. Nchọcha a bụ nchọcha nkọwasị na nkọwami. Ebe nwanchọcha siri wete ngwa nchọcha ya bụ n’akwụkwọ ọgụgụ dị iche iche, ajụjụ ọnụ ọ gbara ndị maara ihe ekwe na-akụ n’ebe osisi dị n’ala Igbo.A chọpụtara na osisi ụfọdụ nwere ugwu na nsọpụrụ pụrụ iche n’ala Igbo karịa ibe ha, ọmụmaatụ: ‘ogirisi’ na-enye aka n’ịkpa oke ala mmadụ na ibe ya, ‘ọfọ’ na-ezipụta eziokwu n’ebe ọ pụrụ iche. N’ikpeazụ, nwanchọcha mejupụtara ebumnoobi ya site n’ime ka a mata na osisi e nwere n’ala Igbo dị ụzọ abụọ; osisi nsọ na osisi nkịtị.