IKE ỌNATARACHI DỊ N’IME ỤMỤ NWAANYỊ: NZIPỤTA YA N’AGỤMAGỤ NDỊ A HỌỌRỌ

Abstract

Ụmịedemede Ọtụtụ ezinaụlọ nọ n’ọgba aghara taa n’ihi na ụmụ nwaanyị nọ n’ezinaụlọ ndị ahụ leghaara ike dị ha n’ime anya ebe ụfọdụ nọ n’ọnọdụ dị otu a n’ihi na o nweghị onye hụtara ike na uru nwaanyị bara n’ezinaụlọ ahụ. Onye ọbụla tụkwasara obi na ọ bụ nna nọ n’ezinaụlọ bụ onye kachasị. Nke a mere e ji họrọ isiokwu a, ka e wee kọwaara ụmụ nwaanyị na ha nwere ike zoro ezo n’ime ha. A chọkwara iji edemede a kwalite mmụọ ụmụ nwaanyị ma mee ka ike a zoro ezo n’ime ha pụta ihe ka ha ghara iche mgbe ihe ike mere ha. N’ihi nke a, a gbasoro usoro nkọwa wee tụchaa nchọcha a. E ji atụtụ mọdarizim mee nchọcha a. Atụtụ a na-ekwu na n’agbanyeghị mmekpa ahụ na akpọmasị ụmụ nwaanyị na-enweta n’aka ụmụ nwoke, ịhụnanya dị ha n’ime na-eme ka ha leghara mmekpa àhụ ndị a anya, mee ihe ziri ezi ọ kachasị n’ebe ezinaụlọ ha nọ. Ngwa ọrụ edemede a bụ agụmagụ ndị gbadoro ụkwụ n'isiokwu a. Ha bụ, Adaeze na ụwa bụ nke Onye. Agụmagụ abụọ a bụ iduuazị. A chọpụtara na nwaanyị nwere ike pụrụ iche dị ya n’ime nke na-apụtakarị ihe mgbe ihe ike mere ya. Ọ na-agba mbọ mee ihe ọbụla o nwere ike ime ka ezinaụlọ ya ghara ịda. E bu n’obi na edemede a ga-enye aka mee ka ụmụ nwaanyị mara na o nwere ike zoro ezo dị n’ime ha nke mere na otu ọbụla o sila dị, ụmụ nwaanyị na-akwụdo hụ na ezinaụlọ ha adaghị. A tụrụ alo ka ụmụ nwaanyị mara na nzọpụta ezinaụlọ ha dị ha n’aka n’ihi nke a, ụmụ nwaanyị kwesịrị ileghara nleda anya a na-eleda ha, na omume ‘ọ gbasaghị m’ ndị di ha na-eme mgbe ụfọdụ, mee ihe ga-enye aka kwalite ezinaụlọ ha.