ỊKỤ AKPARATA: AKWAMOZU NWAANYỊ N’OBODO ỌGWỤ

Abstract

Ụmịedemede Ndị ọcha wetara ụka n’ala Igbo dakwasịrị n’omenaala Igbo, katọọ ya ma mebikwaa ọtụtụ n’ime ha. Nke a mere na imerime ndị ọgbọna-etolite ugbu a amaghị omenaala obodo ha, otu n’ime omenaala ndị ahụ bụ ịkụ akparata. Mbunuuche nchọcha a bụ ịchọpụta ma o nwere ajọ ihe a na - eme mgbe a na-akụ akparata n’akwamozu nwaanyị n’Ọgwụ mere ndị ụka ji machie ndị na-aga ụka ịgba egwu akparata. Ebe ọtụtụ n’ime omenaala Igbo nọzị n’ọnụ ọnwụ, ọ dị mkpa ka edepụta ha n’akwụkwọ ka ọgbọ na abịa n’ihu nwee ike gụọ ma matakwa omenaala ha. E mere nchọcha a bụ ịkụ akparata akwamozu nwaanyị n’obodo Ọgwụ iji hụ na otu n’ime omenaala a na-eme n’Ọgwụ dị na Steeti Enugwu efughị efu. Nke a ga eme ka ndị gụrụ akwụkwọ a mata na omenaala Igbo dị mma. Usoro agbasoro mee nchọcha a bụ usoro sọvee. Nwanchọcha gbara ndị mmadụ ajụjụ ọnụ site n’ogbe iri dị n’Ọgwụ. Ọ gakwara ebe a na-eme mmemme akwamozu nwaanyị lelee ka esi agba egwu akparata nakwa mmemme niile a na-eme tupu a kụọrọ ndị na-akwa nne ha akparata. Site n’ihe ndị agbara ajụjụ ọnụ zara, a chọpụtara na o nweghị ajọ ihe ọbụla a na -eme n’ịkụ akparata. Ọ bụ mmaja ka a na-amaja ndị akwaghị nne ha ka ha wee gbaa mbọ kwaa nne ha maka na nkwenye ndị Igbo, ozu akwaghị akwa na akwụgharị na amanri mmụọ na mmadụ na-achọ onye ọ ga-ememila.